Чаллының 4нче мәктәбендә дүртенче тапкыр «Ябалак 2024» татар телендә төбәкара фән олимпиадасы үтте. Әлеге олимпиада тулысынча 4 нче мәктәп инициативасы һәм көче белән уздырыла. Моңа кадәр ул шәһәркүләм булса, быел ул бөтен республикадан татар телен һәм фәннәрне яхшы белүче укучыларны җыйды. Беренче тапкыр уздырганда 30 укучы гына катнашкан булса, быелгы олимпиадага 160 гариза җибәрелде. «Ябалак» төбәкара фән олимпиадада Яр Чаллы, Түбән Кама шәһәрләреннән, Әгерҗе, Минзәлә, Мамадыш, Лениногорск, Сарман, Кукмара районнарыннан 3-5 сыйныф укучылары катнашты. 3-4 сыйныфлар әйләнә-тирә дөнья, математика, татар теле; 5нче сыйныфлар математика, татар теле, тарих, биология, география фәннәреннән биремнәр чиште. Җиңүчеләр: 5 нче сыйныфлар арасында 2 нче гимназия укучылары Милена Петрова, Регина Кәлимуллина. 4нче сыйныфлар арасында «Адымнар-Чаллы» 59 нчы гимназия укучысы Закир Сираев, Лениногорск муниципаль районыннан Сабир Хәбибуллин. 3нче сыйныфлар арасында 54 нче гимназия укучысы Ралина Зарипова һәм 2 нче гимназия укучысы Наил Абдрахманов. Олимпиаданың бер үзенчәлеге – укучыларның эшләрен махсус программа тикшерә. Ә бу нәтиҗәләрне дөрес, төгәл һәм тиз итеп чыгарырга ярдәм итә.