Җиңеп кайттылар. Республикабызда талантлы балаларны барлау, аларның сәләтен үстерү максатыннан күп кенә чаралар үткәрелә. Шуларның берсе: “Алтын каләм” –балалар, яшүсмерләр һәм яшьләр матбугаты XVIII Республика фестивале -нең финалы 14-18 май көннәрендә Казанның “Идел” яшьләр үзәгендә булып узды. Фестивальнең төп максаты: талантлы яшь журналистларны барлау, аларның игътибарын социаль әһәмияткә ия булган проектларга тарту һәм аларга үсәргә ярдәм итү иде. Быелгы форум , июль аенда Казанда узачак , XXVII Бөтендөнья җәйге Универсиадага багышланды. Бу дәрәҗәле конкурста 76 нчы гимназиянең 9а сыйныф укучылары Галиева Әдилә, Мортазина Альмира һәм Сәлимова Мәдинә дә үз көчләрен сынап карарга булдылар. Алар бирелгән тема буенча телевизион тапшыру әзерләп хөкемдарлар тикшерүенә җибәрделәр. Озак та үтми, аларның эшенең финалга үткәнлеге билгеле булды һәм Казанга чакыру алдылар. Шушы көннәрдә кызлар зур җиңү белән шәһәребезгә кайттылар. “Иң яхшы телевизион алып баручы” номинациясендә аларга тиңнәр булмаган. Фестивальдән кызлар канатланып, күңелле тәэсирләр белән кайттылар. Биш көн эчендә алар дуслашырга, аралашырга, иҗади төркемнәрдә эшләргә, телевизион сюжетлар төшерергә дә өлгергәннәр. Аеруча, тәҗрибәле журналистларның мастер –классларын карау, КФУның абруйлы профессорлары, укытучылары белән очрашулар аларда җылы тәэсир калдырган. Без дә аларны бу иҗади җиңүләре белән котлыйбыз. Киләчәктә тагын да югарырак үрләр яулауларын телибез! Афәрин, кызлар! фотоотчет в разделе "Медиатека"