Бүген безнең мәктәптә көзге каникуллар алдыннан  ата-аналарның гомуми җыелышы узды. Чарада ата-аналар, педагоглар һәм мәктәп җитәкчелеге катнашты. Фикер алышу үзәгендә укучыларның өлгереше, белем сыйфаты мәсьәләләре торды.
Мәктәп директоры Д.А. Гилязева укучыларның беренче уку чирегендәге уңышлары турында җентекле хисап бирде. Ул билгеләп үткәнчә, гомумән алганда, өлгерү нәтиҗәләре яхшыра, әмма игътибарны таләп итүче кайбер кыенлыклар да бар икәнен искәртеп китте.
Директор үз чыгышында шулай ук мәктәптә гамәлгә ашырылган уңышлы проектлар  турында сөйләде.   Ата-аналарга үз балаларына уку процессында ярдәм итү буенча тәкъдимнәр әйтте.
Мәктәп тәрбиячесе В.Фәрхетдинова волонтерлык эшчәнлеге турында мәгълүмат белән чыгыш ясады. Ул агымдагы проектлар турында сөйләде. 
Очрашу барышында ата-аналар сораулар бирделәр һәм үз фикерләре белән уртаклаштылар.