Олы Чакмак төп гомуми белем бирү мәктәбе базасында "Волонтерлык хәрәкәте-хәзерге заман баласының нәтиҗәле социализациясе нигезе» дигән темага педагог-оештыручылар семинары уздырылды. Семинар барышында Ф.Садриев музеена экскурсия оештырылды. Экскурсоводлар язучының тормыш юлы, иҗаты, сәхнә әсәрләре белән таныштырдылар. Темага туры китереп, ике команда педагоглар арасында “21 гасыр волонтерлары” дигән квест-уен үткәрелде, җиңүчеләр билгеләнде. Быел данлыклы пионериянең оешканына 100 ел тула. Шушы датага бәйле рәвештә укучылар “Пионериягә 100 ел” дип аталган тантаналы сбор күрсәттеләр. Пионерларның гимны булган “Взвейтесь кострами” җырын башкарып, барабан кагып, быргы кычкыртып башланган сбор бик күпләрне балачак елларына алып кайтты. Чарага кунак итеп чакырылган ветеран-укытучыларның чыгышын һәр кеше зур игътибар белән тыңлады. Мәктәпнең педагог-оештыручысы Миннур Нәгыймова  “Мәктәптә волонтерлык хәрәкәтен үстерү” дигән темага чыгыш ясады. Балалар тәкъдим иткән җырлы-биюле “Мич котлау” дип аталган театральләштерелгән күренеш 40-50 еллар элек булган чорларга алып кайтты.  Йомгаклау сүзе белән мәктәптән тыш эшләр үзәге методисты Наилә Сәлахова чыкты. Ел дәвамында эшләнгән эшләргә йомгак ясалды, бәйгеләрнең нәтиҗәләре белән таныштырылды. Уку елы башында ук «Балалар хәрәкәте буенча иң яхшы методик эшләнмә» конкурсына старт бирелгән иде.  Бәйгенең лауреатларына мәгариф идарәсе һәм мәктәптән тыш эшләр үзәгенең мактау кәгазьләре, һәр катнашкан педагогка сертификат тапшырылды.