Балалар иҗтимагый хәрәкәтенең ролен аңлату, отряд вожатыйларының дәрәҗәсен күтәрү, педагог профессиясенә кызыксыну уяту максатыннан  һәр елны “Искиткеч вожатый” конкурсы үткәрелә. Быел да шушы традициягә тугры калып, конкурсның муниципаль туры уздырылды. Бәйгедә 13 мәктәптән иң актив әйдаманнар катнашты. Ярыш дүрт этаптан торды: “Үз презентация”, интеллектуаль тур, педагогик ситуацияләр, лайфхак күрсәтү. Әйдаманнар һәркайсы сынауларны уңышлы узып, сорауларга  иҗади якын килеп җавап бирделәр. Бәйге азагында җиңүчеләр ачыкланды. Г.Тукай исмендәге Мөслим урта мәктәбеннән Айсылу Асадуллина 3 урынга, Мари Бүләр мәктәбеннән Зарина Мирсалихова 2 урынга лаек булды. Мөслим гимназиясеннән Эльвина Хафизова исә 1 урынны яулады. Эльвинага Мөслим данын яклап, республика этабында чыгыш ясау мөмкинлеге туды. Һәр катнашкан әйдаман төрле номинацияләрдә җиңүче булды. Аларга мәгариф идарәсенең, мәктәптән тыш эшләр үзәгенең мактау грамоталары тапшырылды.