Бүген гимназиядә, әдибебез Фәнис Яруллинга 80 яшь тулу уңаеннан, гомуми линейка булды. Татар теле һәм әдәбияты укытучысы укучыларга Ф. Яруллинның тормышы, иҗаты турында сөйләп үтте. Иң мөһиме – аның “Хәтер төпләрендә утлы күмер” китабында безнең гимназия турында язган сүзләрен тын да алмыйча тыңладылар. “Бүген Г.Ибраһимов исемендәге гимназиядән ике укытучы 20 ләп бала белән килде. Бер сәгать ярымлап утырып киттеләр. Балалары бик кызыксынучан. Сорау арты сорау яудыралар. Татарча чиста сөйләшәләр. Гомумән, һәр очрашуда телебезнең көчәя баруына ышана барам. Бәлки, шулай яшь буын аша тел чынлап та дәүләт теле дәрәҗәсенә күтәрелер. Татар балалары үзләренең татар икәнлекләреннән оялмый башласалар, күбрәк китапка кызыксыну уянса, милләт юкка чыкмас. Моңа ышанасы килә.” Балалар мондый ышанычны, һичшиксез, акларга кирәк икәнлекне тоеп таралдылар.