Бүген бездә районкүләм тәрбиячеләр һәм башлангыч сыйныф укытучылары семинары булып узды. Аның төп темасы: "Финанс грамоталылыгын" формалаштыруда мәктәпкәчә һәм башлангыч гомуми белемнең өзлексезлеген тәэмин итүгә инновацион алымнар (Инновационные подходы к обеспечению преемственности дошкольного и начального общего образования в формировании "Финансовой грамотности").
Семинарның программасы бик эчтәлекле төзелгән иде. Иң беренче "Мәктәпкәчә яшьтәге балаларга санау шөгыле аша финанс грамоталылыгын формалаштыру"  дигән тема астында, үзенең шөгылен тәрбиячебез Эльмира Марселевна күрсәтте. Балалар "Саннар иле патшасы" җибәргән эзлекле биремнәрне эшләп, сандык таптылар. Шул сандыкта яшерелгән сюрпризны табып, копилка ясадылар. Шөгыль бик кызыклы һәм мавыктыргыч булды.
Семинарның икенче өлеше мәктәптә дәвам итте. Безнең тәрбиячебез Айсылу Ильнуровна үзенең чыгышын тәкъдим итте. Аның темасы "Федераль дәүләт белем стандартын гамәлгә ашыру шартларында балалар бакчасы һәм мәктәп эшчәнлеге барышында дәвамчанлык" дип атала иде. Ул исә эчтәлекле презентация күрсәтеп үтте.
Шулай ук семинарда башлангыч сыйныф укытучылары, төп теманы яктырткан дәрес һәм мастер-класслар үткәрделәр. Үзләренең тәҗрибәләре белән уртаклаштылар. Йомгаклау буларак, мәктәп коллективы белән укучылар "Бирнә җыю" йоласы дип исемләнгән театраль тамаша күрсәттеләр.
Килгән кунакларыбыз семинарны бик ошаттылар. Вагизова Миннури Василовна безнең балалар бакчасының һәм мәктәп эшчәнлеге арасында ныклы бәйләнешкә югары бәя бирде. Семинар оешкан төстә барды, катнашучылар бар да уңай фикердә калдылар.