Экология елы йомгаклары 2017 нче ел Татарстан Республикасында Экология һәм җәмәгать урыннары елы дип игълан ителгән иде. Мәктәптә, табигатькә карашны уңай якка үзгәртү өчен экология елын үткәрүне генә көтеп тормый безнең мәктәп укучылары. Ел дәвамында “ Кошлар көне”, “Урман көне”, “Яшә, чишмә!” операцияләре, “Сөмбелә”, “Нәүрүз” бәйрәмнәре, экологик өмәләр, табигать фәннәре атналыклары үткәрәбез, табигать байлыкларыннан күргәзмәләр, рәсем конкурслары, экскусияләр оештырабыз. Инде берничә ел рәттән “Марш парков” конкурсында катнашып, җиңүчеләр һәм призерлар булдык. Урмышлы мәктәбендә оештырылган Экология елын йомгаклау тантанасына Татарстан Республикасының Табигатьне саклау һәм экология буенча дәүләт инспекторы урынбасары, Динмухаметов Фәрит Нургали улы килде. Ул укучылар чыгышын бик яратып тыңлады, безнең ел дәвамында башкарган эшләребезгә югары бәя бирде. Биология укытучысы Фәрзиева Миләүшә Рудик кызына Министрлыкның Мактау грамотасын тапшырды. География укытучысы Газизова Римма Мәсгуть кызы, мәктәп директоры Сәхабетдинова Резидә Имам кызы, табигатьне саклау эшенә үзләреннән өлеш керткән бер төркем укучылар “Дала” дәүләт табигать заказнигы дипломнары белән бүләкләнде. Экология елы тәмамланды дип кенә табигатьне саклауга юнәлтелгән эшләребез тукталмаячак. Алдагы елларда да игелекле эшләребез дәвам итәр.