Урмышлы мәктәбендә авыл мәчете ярдәмендә корбан ашы үтте. Мәҗлескә авылыбызның өлкән кешеләре, мәчет әһелләре, ветеран укытучылар җыелды. Лениногорск мәчетеннән Булат хәзрәт кунагыбыз булды. Корбан ашы Алтынбаев Идеал, Могыйнов Айдар, Бикмухаметов Әнвәрләр гаиләсе китергән иттән әзерләнде. Укучылар кунаклар алдында Коръән аятләре сөйләделәр, 7нче сыйныф укучысы Хәбибуллин Искәндәр азан тавышы яңгыратты. Кунагыбыз Булат хәзрәтнең вәгазе авыл халкы өчен дә, укучыларыбыз өчен дә бик кызыклы һәм файдалы булды. Авылыбыз мәчете тарафыннан оештырылган “Иманлының юлы туры” рәсем бәйгесенә Илнар хәзрәт йомгак ясады. Җиңүчеләргә мактау кәгазе, бүләкләр өләште гомумән - мәктәп укучыларының берсе дә бүләксез калмады һәрберсе дога китабына ия булды. Мәктәбебез җитәкчесе Резидә Имаметдин кызы әйткәнчә : “14 ел буе укучылар өчен Корбан ашы үткәрелә, бу чара мәктәпнең күркәм традицияләренең берсенә әверелде. Балаларны туры юлга бастыручы, әдәп-әхлакка өндәүче мондый чараларны бергәләшеп үткәргәндә, әлбәттә без тагын да зуррак уңышларга ирешербез, инсафлы балалар тәрбияләрбез”.