Мәктәбебездә “Тукай көннәре” уңаеннан төрле чаралар уздыру каралган. Бу атнада татар теле һәм әдәбияты дәресләрендә укучыларга “Г. Утыз Имәни мирасы” музей-кабинетына экскурсия оештырылды. Без  үзебезнең   якташыбыз, Тимәш авылы кешесе - Габдерәхим  Госман  улы  Утыз  Имәни  әл-Болгариның - татар әдәбияты тарихында калдырган әдәби мирасы белән горурланабыз. Г.Утыз Имәни Тимәштә яшәгән, гомеренең соңгы көннәренә кадәр шушы авылда иҗат иткән, балаларга белем биргән. Аның 100 гә якын хезмәте сакланып калган диелә. Аның күп төрле гыйльми, әдәби, тарихи һәм дини темаларга язган әсәрләре булуы мәгълүм. Ул  әсәрләр безне матурлыкка, яхшылыкка өйрәтә, шәфкатьле, гадел, кыю булырга өнди, итәгатьле, белемле, дус, тату булырга чакыра. Ниндидер могҗизалар белән безгә кадәр килеп җиткән һәм  сакланып калган мирасыбызны кадерләп өйрәнү, алдагы буыннарга җиткерү, “туган як”, “туган ил” төшенчәләренең мәгьнәсен ачуда туган як тарихын, шул исәптән ил, милләт тарихында эз калдырган күренекле шәхесләрнең тормыш һәм иҗат сәхифәләрен өйрәнү безнең бурыч.