Безнекеләр семинарда...

Нинди өлкәдә эшләсә дә, адәм баласы һәрвакыт үз белемен күтәрү өстендә эшләргә тиеш.”Белемле үлмәс, белемсез көн күрмәс” диләр халыкта. Белем ул студент чакта яки курслар узганда гына тупланырга тиеш түгел. Ул һәрдаим хәрәкәттә. Белемле кешене гөл белән чагыштырып карарга булыр иде: әйтик, көн дә үз өстендә эшли, тәҗрибә уртаклаша һәм аны туплый белгән кеше еллар әйләнәсе чәчәк атучы гөл белән тәңгәлләштерелә.

Белем бирү өлкәсендә эшләгән һәрбер кеше – чәчәк атучы гөл булырга тиеш. Укытучы яңалыклар белән сулап яши.  23нче апрель көнне районыбызның10 нчы санлы урта гомуми белем бирү мәктәбендә “Татар теле һәм әдәбиятын укытуда, сыйныфтан тыш чараларда яңа методика, заманча технологияләр кулланып белем сыйфатын күтәрү” темасына муниципаль гамәли семинар булып узды. Анда безнең мәктәпнең татар теле һәм әдәбияты укытучылары Закирова Гөлия Моратовна һәм Фәррахова Динара Рамиловна да катнашты. Тәҗрибә тупларга җыелган татар теле һәм әдәбияты укытучыларына сингапур структуралары ярдәмендә төзелгән дәресләр күрсәтелде. Карап үтелгән дәресләрдән соң, без әлеге мәктәптә чынлап торып заман белән атлаучы, ел әйләнәсе чәчәк атучы татар теле мөгаллимәләре эшләвенә тагын бер кабат инандык.