Туган тел - милли яшәешнең төп шарты. Тел язмышы милләт язмышы белән тыгыз бәйләнгән. Без Татарстан җирендә яшибез икән, телебезне дә камил белергә тиешбез. Балаларыбызны милли традицияләр, бәйрәмнәр, бөек кешеләр белән таныштыру максатыннан мәктәбебездә ел саен Туган тел атналыгы үткәрелә.

      17 апрель көнне атналыкны ачу тантанасы булып узды. Атналык башлангыч сыйныфларда “Тукай әкиятләренә сәяхәт” исемле рәсем бәйгесе белән башланып китте.   Мәктәбебезнең китапханәчесе укучылар өчен “Күп укысаң, күп белерсең”    дип исемләнгән китаплар күргәзмәсе оештырды, укучыларны Габдулла Тукайның  иҗаты һәм китаплары белән таныштырды.

 Шулай ук мәктәбебездә кечкенә сыйныф укучылары арасында шигырь бәйгесе гөрләп үтте. Анда балалар Тукай шигырьләрен сәнгатьле итеп сөйләделәр. “Бала белән Күбәләк”, “Эш беткәч уйнарга ярый”, “Таз”, “Кызыклы шәкерт” шигырьләрен сәхнәләштереп сөйләделәр.18 апрель татар халкының бөек шагыйре Габдулла Тукайның тууына 137 ел тууга багышланган районкүләм “Моңлы Тукай теле” бәйгесендә мәктәбебезнең 6нчы сыйныф укучысы Ягудина Фидалия шагыйрьнең “Шүрәле” һәм “Туган авыл”  әсәрләре белән уңышлы чыгыш ясады.