9 нчы нчы февраль көнне гимназиябезнең актлар залында Милли мәдәниятләр һәм гореф-гадәтләр елын ачу тантанасы булды. Бу көнне 1 А сыйныф укучыларының әти-әниләре һәм сыйныф җитәкчесе Венера Ләбип кызы “Аулак өй баттл”- әдәби ярышы үткәрде. Гимназиябезнең актлар залы җыр-моңнан, баян тавышыннан, әниләрнең күңелле гапләшүеннән яңгырап торды. “Аулак өй баттл”- әдәби ярыш башланып китте.

Калфаклар, матур күлмәкләр кигән әниләребез ике командага бүленеп бизәлгән өстәлләр артына кереп утырдылар. Бер команда “Гүзәл кызлар” булса, ә икенче команда “Дуслык” исемен сайлаган иде. Бәйге  сәламләшүдән башланып китте. Һәр бәйгене жюри билгеләп барды. Билгеләү дә гади түгел, ә ике команданың да кәрзиннәренә баллар урынына кәнфитләр салынды.

Икенче бәйгедә  тиз арада  таралган шигырьне җыйдылар. Мәкальләрнең азагын табу бәйгесе аеруча кызыклы булды. “Кемнең  миллионер буласы килә?” бәйгесендә үтә дә тырышлык күрсәттеләр. Татар халык уеннарын бик яратып уйнадылар, тамашачыларга да өйрәттеләр. “Тел чарлау” уенында һәр ананың зирәклеге сыналды. Әниләребез татар язучыларын да беләләр булып чыкты. “Язучыны таны” бәйгесе  моның дәлиле булды. Аеруча “Йөзек салыш “уены халык күңеленә хуш килде. Араларында җырчылар, биючеләр, шигырь сөйләүчеләр бик күп иде.

  Жюри членнары да бик дөрес  итеп бәя бирде: “Гүзәл кызлар” командасы 48 балл җыеп җиңү яуласа, “Дуслык” командасы  бары 3 баллга калышып 45 балл туплап 2 урынга лаек булды.