15 нче февраль көнне Хәрби-патриотик айлык кысаларында Зәй-Каратай төп гомуми белем бирү мәктәбендә бертуган Фазыл һәм Кәбир Туйкиннарга багышланган “Яралы язмышлар” дип исемләнгән искә алу кичәсе булып узды.
Кеше гомере – диңгездәге бер тамчы, мәңгелекнең бер мизгеле генә. Шушы кыска гына вакыт эчендә кеше зур-зур планнар кора. Барлык уйлаганын эшләп өлгерергә, җирдә үзенең эзен калдырырга, мәңгелек исем, мәңгелек яшәү алырга тели һәм гомере буе шуңа омтыла. Һәр кешенең яшисе дә, яшисе килә! Ләкин язмыш кешеләр өчен көтелмәгән борылышлар, мәшәкатьләр, хәтта кайгы һәм бәхетсезлекләр әзерләп куярга мөмкин.
XX гасырның 30 нчы еллары ... Россиядә сәяси репрессиянең котырынган чоры. Ул еллардагы афәт дулкыны Бөгелмә татар мәгърифәтчеләрен дә читләтеп үтми. «Атласовчылар эше» буенча гына да 24 кеше гаепләнә. Янәсе, Һади Атласов җитәкчелегендәге татар зыялыларының бик зур яшерен оешмасы гомумтөрки Туран дәүләтен төзү өчен көрәш алып барган. 1937 елның 23 — 28 октябрендә булган ябык утырышта хәрби трибунал 24 кешене ГУЛАГка озатырга, 9 кешене атарга хөкем итә... Шулар арасында бертуган Кәбир һәм Фазыл Туйкиннар да була.1938 нче елның 15 нче февралендә карар үтәлә. Мәгариф тарихында күренекле урын тоткан авылдашларыбызны искә алу кичәсе узды. Чарага Туйкиннарның туганнары – Марат Туйкин, Сылу Насыйбуллина, Лилия Нәбиуллина,Әлфия Туйкина, үзешчән тарихчы-Хәлимов Җәүдәт абыйлар чакырылган иде. Алар укучыларга бик эчтәлекле чыгышлар әзерләгән иделәр.