Кошлар ярдәм көтә Безнең балалар бакчасында тәрбияви әһәмияткә ия булган төрле экологик чаралар үтә. Алар ”Кышлаучы кошларны каршылау”, “Кошлар ашханәсе” кебек экологик операцияләре кыссаларында ел дәвамында бара. Безнең якта кышлаучы кошларның санын саклап калуга җаваплылык хисе тәрбияләүне, кошлар турында белемне тирәнәйтүне күздә тотып, кошларга кыш көне ярдәм кулы сузып, табигатькә сакчыл караш тәрбияләү, аны саклау хисе булдыру, кошларның яшәү рәвеше белән таныштыру, аларга ярдәм кирәклеген төшендерү өчен эшләнә бу эшләр. Кышкы чор кошлар өчен иң авыр вакыт.Табигать үзенекен итә, кыш көне азык табу кошларга бик кыенлаша. Кышларга калучы кошлар, азык табу җиңелерәк булмасмы дип, кешеләр яши торган урыннарга күченеп килә.Чыннан да, суык кешеләргә генә түгел, кошларга да каныга. Кошлар бездән ярдәм көтә. Шуңа күрә дә, кышлаучы кошларга ярдәм итү йөзеннән, балалар төрле - төрле җимлекләр ясап элеп куйдылар. Кайсы җимлеккә нинди кошлар килүен һәрдаим күзәтеп, карап, ризык белән тулыландырып торалар. Әкрен генә кышлар үтеп ямьле язлар якынлаша. Хәзер безнең бурыч җылы яктан кайтучы, кечкенә канатлы дусларыбызны оялар әзерләп каршы алу. Безнең балалар бу эшкә дә җиң сызганып эшкә тотыначакларын белдерделәр. Ояларының нинди булачагы турында эскизлар сызып мәш итәләр. Исән - сау туган илләргә кайтыгыз гына ,канатлы дусларыбыз, без сезне колач җәеп каршы алырбыз.