Бүген, 25 март көнне, Шөгер «Тургай» балалар бакчасында борынгы гореф-гадәтләребезне яңартып, «Карга боткасы» бәйрәме үткәрелде. Чараны татар теле тәрбиячесе Рамилә Наилевна бик җанлы һәм кызыклы итеп алып барды.

Бәйрәм чын татар традицияләре буенча башланды: балалар өйдән-өйгә йөреп, түтәйләрдән ботка пешерү өчен күчтәнәчләр җыйдылар. Китапханәче Светлана Владимировна да читтә калмады — ул нәниләрне үзенең иң тәмле, кайнар кабартмалары белән сөендерде. Бәйрәмнең төп кунагы — шаян Шәвәли булды! Балалар аңа кошларның табигатькә файдасы турында сөйләделәр, бергәләп матур җырлы-биюле уеннар уйнадылар. Шәвәли исә барысын да үзе пешергән  майлы, тәмле  боткасы белән сыйлады. Ботканың бер өлеше-җир анага-җир мул булсын өчен, икенче өлеше- күк атага-яңгырлар яусын өчен калдырылды. Канатлы дусларыбызны да онытмадылар — ботканың өченче өлеше кошларга-кошлар тук булсын өчен, ә калган дүртенче  өлеше –балаларга-сау-сәламәт булсын өчен бүлеп бирелде.Милли рухлы, күңелле бәйрәм һәркемнең күңелендә җылы истәлекләр калдырды.