Бүген  24 сентябрь көнне “Шөгер “Тургай” балалар бакчасында “Җырлыйк әле” дип исемләнгән  бәйге оештырылды. Чара якынлашып килүче “Тәрбияче һәм барлык мәктәпкәчә белем бирү хезмәткәрләре көне”  уңаеннан үткәрелде. Бәйгенең төп максаты: татар җырларына карата мәхәббәт, туган якка карата кадер-хөрмәт, ярату, олылау хисләре тәрбияләү, тәрбиячеләрнең  иҗади активлыкларын арттыру.  “Җырлыйк әле” бәйгесендә  “Тургай” һәм “Кояшкай” балалар бакчасының  тәрбиячеләре катнаштылар.  Барлык килгән кунакларны  татар теле тәрбиячесе Рамилә Наилевна һәм музыка җитәкчесе Мәдинә Кадеровна сәламләделәр һәм “Очрашу” җыры белән бәйгене ачып җибәрделәр. Тәрбиячеләр  3 командага бүленеп  үзләренең зирәклекләрен, тапкырлыкларын, җырларны танып белү сәләтләрен күрсәттеләр,элеккеге һәм хәзерге заман   җырларын искә төшерделәр, бергәләп башкардылар. Жюрилар: “Тургай” балалар бакчасының мөдире Сания Гамировна, өлкән методист  Гүзәл Гәлләмовна һәм “Кояшкай” балалар бакчасының мөдире Гөлназ Альбертовна тәрбиячеләрне төрле номинациялщр буенча бүләкләделәр. Бәйге күңелле, җанлы рухта үтте. Чара “Сез иң гүзәл кеше икәнсез ”җыры һәм чәй эчү  белән тәмамланды.