Бу көнне  1-4 сыйныфларда ата- аналар җыелышлары узды. Анда көнүзәк сораулар каралды, әти-әниләр 1нче чирек нәтиҗәләре белән таныштырылды, алда торган бурычлар турында сөйләшенеп карарлар кабул ителде.

Укучыларыбыз  мәктәпкүләм һәм муниципаль конкурсларда бик актив катнашалар. Лениногорск районының өстәмә белем биру үзәге оештырган  "Көзге фантазия"  конкурсында 1 нче сыйныф укучысы Гайнетдинов Ринат, 2нче сыйныфтан Гимаев Раиль призлы урыннар яулады. Котлыйбыз аларны!. 

      Күпкырлы шәхес тәрбияләүдә, укучыга  патриотик, экологик тәрбия бирүдә, шәфкатьлелек һәм мәрхәмәтлелек белән сугарылган экскурсияләрнең  әһәмиятен ассызыклап үтү кирәктер. Экскурсия-Яңа Иштирәк мәктәбенең уку-тәрбия эшендә мөхим чараларның берсе генә тугел, ә укучыларның көтеп алган традиция дә әле ул! 2022нче елның маенда Татнефтьнең  Шөгер битум заводы музеенда булып кайтсак, сентябрьдә авылыбызның гүзәл табигатенә, елга-күлләренә, биек тауларына, калын урманнарына, чишмә буйларына, тирә-якта дан казанган шомырт әрәмәсенә экскурсияләр оештырылды һәм күзәтүләр нигезендә рәсемнәр ясалды, иншалар язылды.авылдашыбыз шагыйрь Таһир Шәмсуаровның шигырьләре укылды.

Күңелле ярышлар белән көзге марафон үтте. Укучылар бәйрәмгә залны бизәп, экомода күрсәттеләр, спорт ярышларында узыштылар. Бәйрәм бик кызык итеп оештырылды.

5 нче октябрь- Укытучылар көне. Хәтерлим әле мин бүгенгедәй, -дип җырдагыча тәүге тапкыр мәктәп бусагасын атлап керү, укытучы апаның каршы алуын һәрбер кеше гомер буе күңелендә саклый. Бу көнне мәктәп балаларның шат җырларыннан, дәртле биюләреннән, матур шигырьләреннән яңгырап торды. Бәйрәмдә ветеран укытучыларыбыз: Гөлсинә Муса кызы, Әлфирә Мөкаддәс кызы, Заһирә Ярулла кызы, авыл башлыгы Голия Рәфкать кызы кунак булдылар.Укучыларыбыз аларны шау чәчәккә күмделәр. Укытучыларга Гөлия Рәфкатовна "Август"җәмгыятенең бүләген тапшырды.Бәйрәм чәй табыны артында дәвам итте. Бәйрәмне  укытучылар: Зайниева Г.Т., Галимова А.Ш., һәм өстәмә белем бирү педагогы Закиева Ф.И. оештырды. 

1нче октябрь-Олылар көне.Укучыларыбыз үзләренең эби- бабаларына кулдан ясалган котлау открыткалары бүләк иттеләр. Яңа Иштерәк мәдәният йортында концертта катнаштылар.

Татарстан Республикасы буенча балаларның куркынычсызлык кагыйдәләрен үтәүләренә карата 20нче августтан 20нче сентябрьгә кадәр Куркынычсызлык  айлыгы игълан ителде. Яңа Иштерәк башлангыч мәктәбенең тәрбия планы нигезендә укучыларга юл йөрү кагыйдәләре, янгын куркынычсызлыгы, үз-үзеңне саклау чаралары хакында сыйныф сәгатьләре, видеофильмнар карау , эвакуация күнегүләре һәм Шөгер янгын сүндерүчеләре белән очрашулар үткәрелде.