14 май  көнне  мәктәбебез   укучылары  район  күләмендә  үткәрелгән "Сөркә  оясы  тирәсен  җыештыру" акциясенә кушылып,   халык  телендә  "Юа тавы" дип аталган тау  сыртларын  чүптән  чистартуда  актив  катнаштылар. Юа  тавы  элек-электән  халыкның яратып  җиләк  җыйган, печән  чапкан урыны. Монда  сөркәләр күпләп  яши , Кызыл  китапка  кертелгән  язгы  утчәчәк, имәнлек  җилдәге, юа, дарулы алтей үсемлекләре үсә.  Ләкин берничә ел элек  тауда  карьер ясадылар, нәтиҗәдә  тау  табигатенә  зур зыян килде.  Таш алганнан соң  калган  чокырларда  бүгенге көндә авылның  чүплеге. Җил очырган  чүпләр  бөтен  тау  сыртын  һәм  көтүлек  җирләрен  тутырган. 6-9 класс укучылары  дәресләрдән соң  тауны  чистарту эшендә  катнашты. Укучылар  чүпләрне капчыкларга  тутырып, тиешле урынына илтеп  ташлады. Барлыгы 20 капчыктан артык чүп  җыелды. Апрель аенда узган өмәдә түбән класс укучылары ярдәмендә, авыл янәшәсендәге ике  тау сырты чистартылган иде.  Әлеге чара   балаларда әйләнә-тирә табигатькә сакчыл караш тәрбияләүдә зур әһәмияткә ия булды.  Укытучылар   коллективы  һәм укучылар  авыл  халкын табигатькә битараф булмаска, чүп-чарны теләсә кайда ташламаска  чакыра.