Сугыш елларындагы җырлар һәм шигырьләр…. Никадәр күп иҗат ителгән алар! Алар барысы да матур һәм онытылмаслык. Ватанга мәхәббәт һәм үз халкың өчен горурлык, бурыч хисе, уртак эш өчен җаваплылык, намус һәм  гаделлек бар аларда.  2023 елның 28 февралендә “Җиһан” балалар иҗат үзәгендә  Татарстан Республикасы Кукмара муниципаль районында туган Украинадагы махсус хәрби операциядә катнашкан һәм  һәлак булганнар истәлегенә багышланган “Безгә бу дөньяны сакларга васыять ителгән!”  төбәкара патриотик җыр һәм шигырьләр фестиваленең йомгаклау этабы узды. Фестивальнең читтән торып үткәрелгән этабында Татарстан Республикасының Нократ Аланы шәһәреннән, Кукмара, Балтач, Мамадыш, Теләче районнарыннан 110 укучы катнашты. Фестивальнең йомгаклау этабына Татарстан Республикасының 29 гомуми белем бирү оешмасыннан һәм Киров өлкәсенең Нократ Аланы шәһәреннән барлыгы 66 конкурсант килде. Алар арасында 29 солист, 37 шигырь сөйләүче  бар иде. Фестивальдә катнашучыларның барысының да югары әзерлек дәрәҗәсен билгеләп үтәсем килә. Конкурста туган җирнең киңлекләре турында  композицияләр, шулай ук курку белмәс солдатларның батырлыклары, Рәсәй армиясенең көчлелеге турында шигырьләр яңгырады.