18 август көнне районыбыз үзәгендә, республика масштабында, гөрләтеп "Кичке уен" уздырылды. Ата-бабаларыбыздан сакланып килгән әлеге матур гореф-гадәт бүген төрле милләт вәкилләрен берләштерде. Бу юлы да "Кичке уен"да катнашкан фольклор коллективлары, Галия Кайбицкая исемендәге музей яныннан, гармун уйнап, җырлап-биеп, "Имәнлек" паркына юл тоттылар. Бәйрәмдә Апас, Тәтеш, Буа, Чүпрәле, Әтнә, Арча һәм Мари Эл республикасыннан килгән коллективлар, Кайбычның фольклор, вокал коллективлары, гармунчылары катнашты. Аларның барысын да район башлыгы Альберт Рәхмәтуллин сәламләде, "Кичке уен"ның барыбызны да берләштерүен, дуслыкны ныгытуын әйтте, аның дәвамлы булуын, республика масштабында гына түгел, Россия күләмендә танылу алуын теләде. Татарстанның төрле почмакларыннан, Мари Элдан кунак булып килгән фольклор коллективларына рәхмәтен белдерде.