21 нче февраль - Халыкара Туган тел көне. Бу көн 2000 нче елдан башлап ЮНЕСКО карары нигезендә билгеләп үтелә башлады. Безнең мәктәптә дә 15-22 февральдә “Туган тел” атналыгы үтте. Атналык кысаларында татар теле һәм әдәбияты укытучылары мәктәп күләмендә төрле чаралар үткәрделәр: М.Җәлил шигырьләренә иллюстрацияләр бәйгесе, «Газиз туган телем» - интеллектуаль викторинасы,“Тел-күңел көзгесе”- зирәкләр һәм тапкырлар бәйгесе, “Туган телем минем” - акыллылар бәйгесе, туган тел көненә багышланган “Могҗизалар кыры” уены, “Туган телем – иркә гөлем!” – йолдызлы сәгать, “Милләтем – горурлыгым минем” темасына проект эшләре яклау. Укучылар телгә багышланган сочинениеләр, шигырьләр яздылар, викторина сораулары, ребуслар, башваткычлар төзеделәр, тел галимнәре, тел турында кызыклы материаллар тупладылар. Телләр белү милләтара дуслыкны ныгытырга да ярдәм итә. Шуңа күрә дустыңның туган телен дә, аларның мәдәниятен дә, үз туган телеңне дә, мәдәниятеңне яраткан кебек якын итәргә, хөрмәт итә белергә кирәк.