Коръән – мөселманнарның, шул исәптән татарларның да күңеленә изге сүз булып сеңгән һәм аларның рухи дөньясын ту­тырган китап. Укыгач, пакь сөлгегә төреп, киштәгә куеп сак­ланган язмаларның иң кадерлесе. Элек-электән Коръәнне гарәпчә укый белә торган кешегә астан өскә карый торган булганнар... Моңарчы татар әдәби телендә Коръән булмаган, халык сүрә-аятьләрне гарәпчә яттан бикләп намазларда укыган. Дини белем чы­ганагы булып, ана телендә бер Ногмани хәзрәт Коръән-тәфсире хезмәт иткән. Аерым сүрәләр, аерым аятьләр, хәдисләр, вәгазьләр, аңлатмалар мәдрәсәләрдә дә, гаиләдә дә кулланылган. Әлбәттә, соңгы 10-15 ел эчендә татарча да, русча да ислам турында бик күп уку әсбаплары китап киштәләрендә урын алды. Сиксән милләт телендә укыла торган Коръән тик татар телендә генә юк иде. Ниһаять, 2000 елның башында татар телендә берьюлы ике Коръән басылып чыкты.
Әйе, бүген ана телебездә басылып чыккан Коръәни-Кәрим китабы кулыбызда. Аның турында бик кыска гына мәгълүмат биреп, тәрҗемәсе тирәсендә фикер йөртәсе килә. Коръәннең бе­ренче нөсхәсен атаклы язучыбыз Рабит әфәнде Батулла тәрҗемә иткән, икенчесен – Фәрит хәзрәт Сәлман. Яңа басмалар шатлан­дыра: тәрҗемәнең икесендә дә текст бер үк биттә гарәпчә һәм татарча янәшә бирелгән.