«Укытучы – укучы – ата-ана». Менә шушы бәйләнешне истә тотып, безнең мәктәп укытучылары бик күп кенә нәтиҗәле эшләр алып бара. Гаилә тәрбиясенең әһәмияте елдан ел арта бара. Ул балага гаять зур йогынты ясый. Ә мәктәп үз чиратында аның уңай йогынтысын педагогик яктан баетырга, максатчанрак итәргә һәм көчәйтергә тырыша. Болай эшләү һичшиксез гаиләне мәктәпкә якынайта. Мәктәбебездә укыту-тәрбия эшләре әти-әниләр белән тыгыз элемтәдә алып барыла. Авыл мәктәбендә эшләүче сыйныф җитәкчесе һәр укучының ата-анасы, гаиләсенең яшәү шартлары белән яхшы таныш. Укытучы һәр гаиләнең иҗади мөмкинлеген белә, шуннан чыгып бәйрәм, кичә, экскурсияләр оештырганда, һәрбер ата-ананың нәрсә белән кызыксынуын, нинди эшкә оста булуын искә алып, төрле чараларга җәлеп итәргә тырыша.Гаилә ныклыгын, өлкән буын белән мөнәсәбәтләрне чагылдыручы гаилә бәйрәмнәре традициягә кереп китте. “Әти-әни һәм мин - спорт сөюче гаилә”, “Әти – гаиләнең горурлыгы”, “Үрнәк гаилә”, “Әнием-кадерлем”, “Без бердәм, тату гаилә” кичәләре шундыйлардан. 

Менә бүген дә 3 һәм 4 сыйныф укучылары өчен гаилә бәйрәме үткәрелде.Гаилә! Никадәр шатлык, никадәр тантана бу сүздә! Бала hәм гаилә. Бу ике сүз тыгыз бәйләнгән, баланы гаиләсез, гаиләне баладан башка күз алдына китерүе кыен. Тату гаилә – ил терәге, Бала өчен иң кирәге. Тату гаилә бердәм булса, Бала бәхетле була. Ә нәрсә соң ул гаилә? Ул нәрсәдән башлана? Ни өчен бик кадерле, якын сүз ул? Без бу сорауларга җаваплар табарга тырыштык  hәм күңелле ял иттек.