Бүген Алабуга районы Морт авылында "Каз өмәсе" республикакүләм чарасы узды. Бөтен йолаларына туры китереп әзерләнгән бу чарада авылның бар кешесе катнашты. Каз йолку, аны эшкәртү, каурый суеру, май канаты ясау, өмә күренеше, казларны көянтәләргә  элеп, гармунга җырлый-җырлый чишмәгә алып барып юу,  чишмә юлына теләкләр әйтеп, каурый сибү, чишмә янында җыр-бию, уеннар... Әлбәттә, урамдагы тәгәрмәчле мичтә пешкән, телләреңне йотарлык каз коймагы, кыстыбый, дучмак, өчпочмак-бәлешләр, гөбәдия, кош теле, пәрәмәчләр, каз шулпасы, өем-өем каз ите... Сый-нигъмәттән  сыгылып торган өстәл - авыл кешеләренең уңганлыгын, булганлыгын, киң күңелле  булуларын күрсәтә. Әйе шул, татар халкы эшли дә, ял да итә белә!