Укучыларда  татар халкының тарихына, әдәбиятына мәхәббәт, патриотик хисләр, милли үзаң тәрбияләү, сәләтле укучыларны барлау максатында һәм Бөек Җиңүнең 70-еллыгы уңаеннан Казан шәһәре Совет районының  20 нче гимназиясендә ТР Мәгариф һәм фән министрлыгы белән берлектә оештырылган “Алиш эзләреннән” исемле I төбәкара фәнни-гамәли конференциягә 1200 дән артык эш кабул ителгән. Бу дәрәҗәле бәйгедә безнең мәктәптән дә ике укучы катнашты. Сайлап алу турында 7 нче сыйныф укучысы Азмуханова Айгелнең “Шигърият бакчасында” номинациясенә җибәрелгән эшенә сертификат тапшырылды, иҗат җимешләре “Алиш эзләреннән” исемле җыентыкка кертелде.

28 нче апрель көнне  фәнни-гамәли конференциянең  йомгаклау  тантанасына  чакырылган II турга үтүче укучылар арасында мәктәбебезнең 8 нче сыйныф укучысы  Асадуллина Алсу да бар иде. Ул  “Әдәбиятта батырлык темасы”  юнәлешендәге эшен яклады  һәм, призлы урын яулап,
 III дәрәҗәле Диплом белән бүләкләнде, фәнни эшенең тезислары аерым җыентыкка кертелде. Шагыйрә Йолдыз Шәрәпова аңа үз имзасын куйган өр-яңа китабын да тапшырды. Җиңүчеләрне бүләкләү тантанасында   галимнәрнең  һәм балалар язучысы, шагыйрь   Абдулла Алиш туганнарының чыгыш ясавы, кичәнең җыр һәм биюләр белән үрелеп баруы мәңге онытылмаслык хатирәләр калдырды.  Укучыларыбызны бу җиңүләре белән тәбрик итәбез, тагын да зуррак уңышларга ирешүләрен телибез.