Чүпрәле районыныда уздырылган “Татар әдәбияты көннәрен”дә  безнең мәктәпкә филология фәннәре докторы, Казан Федераль университеты профессоры Фоат Галимуллин һәм шагыйрь, журналист, “Ватаным Татарстан” газетасының авыл хуҗалыгы бүлеге мөхәррире Камил Сәгадәтшиннар килде. Иҗат сөюче укучылар аларны җор телле шигырьләр белән җылы  каршы алды. Очрашу мәдәният йортында  авыл халкы, мәктәп укучылары  белән эчкерсез аралашу формасында дәвам итте. Кунаклар үзләренең тормыш һәм иҗат юлы турында тәфсилләп  сөйләделәр. Фоат ага Галимуллин залдагы халыкка  мәктәп укучыларының иҗат җимешләрен дә укып күрсәтте һәм  Иматдинова Айгөл, Фәткуллин Рәсим, Әзмуханова Айгөлләрнең каләме өметле булуын күрсәтте. Очрашу барышында залдагылар үзләрен  кызыксындырган сорауларга җавап та  тапты. Әңгәмә шулкадәр җанлы төстә барды,балалар соравы буенча олы галим Фоат Галимуллин үзенә генә хас булган бәрхет тавыш белән  татар халык җырын башкарып күрсәтүдән дә тартынмады.
    Очрашу кичәдә катнашучы  һәр кешегә онытылмас мизгелләр бүләк итте.