Балачак кеше тормышының гаҗәеп гүзәл мизгеле.  «Сабантуй» газетасы балачакны, малай-кызларның ихлас күңелләрен, аларның эш-гамәлләрен чагылдыручы көзге кебек. Газета яшь каләм тибрәтүчеләр өчен иҗат мәйданы, батырлык, шәфкатьлелек, матурлык мәктәбе, тормыш дәреслеге дә. Газета битләрендә көрәшергә, бил алышырга, төрле бәйгеләрдә катнашырга, үзеңне сынарга, үстерергә мөмкин.

«Сабантуй» газетасы укытучыларның, класс җитәкчеләренең, тәрбиячеләрнең, әти-әниләрнең, әби-бабайларның төп ярдәмчесе. Газета битләрендә үсеп килүче яшь буынны тәрбияләү, аларның дәрестән тыш вакытларын файдалы итеп уздыру, республикадагы балалар хәрәкәтен үстерүгә дә зур игътибар бирә.

Ай саен ТР Эчке эшләр министрлыгының ЮХИДИ белән берлектә чыгучы Хәерле юл сәхифәсе балаларыбызны юлларда исән-имин сакларга, аларны юл кагыйдәләрен белергә өйрәтүче иң шәп кулланма. Татар халкының танылган шагыйрь-язучыларына, сәнгать эшлеклеләренең юбилейларына багышланган сәхифәләрне педагоглар дәресләрдә куллана. Сабантуйлы балачак – киләчәкле балачак. Сабантуй да чыныгу алган малай-кызлар тормыш дигән олы сабантуйда да сынатмаслар.

 «Сабантуй» газетасының баш мөхәррире Гыймадиев Айдар Марс улы белән берлектә АйФаРа төркеме безнең районда да булдылар. Алар безнең авыл мәдәният йортында  “Сабантуй” газетасына язылучы район укучыларына концерт куйдылар,уеннар уйнаттылар.Концерт бик күңелле үтте. “Сабантуй” газетасы хезмәткәрләренә иҗади уңышлар телибез!