Бүген  мәктәбебездә  татар теле һәм әдәбияты укытучылары өчен «Татар теле һәм әдәбияты дәресләрендә белем бирү сыйфатын күтәрү» темасына семинар үткәрелде. Семинар эшчәнлегендә рус мәктәпләрендә белем бирүче татар теле һәм әдәбияты укытучылары да  катнашты. Семинарны ачып җибәргән мәктәп директоры Абдуллина Г.Ш. мәктәпнең укыту һәм тәрбия торышы турында сөйләде. “Яңа федераль белем бирү стандартларына күчеш шартларында милли мәктәпнең үсеш перспективалары” темасы буенча чыгыш тыңланды.Килгән кунакларга музей җитәкчесе Хабибуллин Л.А. тарафыннан туган як музеена  сәяхәт оештырылды. Семинар барышында мәктәпнең татар теле һәм әдәбияты укытучысы Хабибуллина А.Г. 11 сыйныфта “Г.Ахуновның “Хәзинә” романында заман яңалыгы чагылышы”, башлангыч сыйныф укытучысы Тагирова Ф.Ф. 3-4 сыйныфларда “Сыйфат” темасын кабатлау буенча ачык дәресләр  күрсәттеләр . Файзрахманова Г.Ф. укытучылар белән “Лексика буенча урта сыйныфларда дәүләт йомгаклау аттестациясенә әзерлек эшләре “ темасы астында мастер-класс оештырды. Укытучылар үз эшчәнлекләрендә Сингапур структурасын бик отышлы кулландылар. Фазулова Г.И тарафыннан әзерләгән  «Җыр булырлык сүзләр биргән, Туган телем, рәхмәт сиңа!”  дигән темага класстан тыш  чара   укучыларга  да,  кунакларга да бик ошады.

Фикер алышуда мәгәриф бүлеге методисты Вәлиуллина Ф.М. райондагы милли мәгариф өлкәсендәге яңалыклар, укытучыларның эшчәнлеге, эшләү юнәлешләре турында сөйләде.  Татар теле укытучылары ФГОС шартларында туган сораулар, алда торган бердәм республика тесты  һәм 9 нчы сыйныфларның  татар теленнән имтиханы (иҗади биремле изложение язу) буенча  хәзерлек эшләре барышы турында сөйләшүләр алып бардылар.