Тарих атналыгы кысаларында Туймәт төп белем мәктәбендә төрле чаралар үткәрелде. Атналыкның соңгы көнендә 6 - 9 нчы сыйныф укучылары Бөек Җиңүнең 70 еллыгына багышланган "Җиңү викторинасы"нда катнаштылар.  Викторина сораулары балаларга алдан тәкъдим ителгән иде. Аларга сорауларга җавапларны табу һәм әзерләнү өчен мөмкинлек бирелде. Ә менә бәйге вакытында җавап бирүче укучы сорауга кагылышлы шәһәрләрне, илләрне картадан күрсәтергә, шәхесләрнең исемен генә түгел, портретыннан танып алырга, орден-медальләрне, хәрби техникаларны рәсемнәрдән  дөрес күрсәтергә дә тиеш булдылар. Кайбер җаваплар башваткыч формасында да "яшерелгән" иде. Викторина барышында укучылар шәхси беренчелек өчен баллар җыйдылар. Ә тарих атналыгы буенча нәтиҗә гомуми линейкада ясалачак.