Туймәт авылы мәдәният йортында узган зур күләмле ретро-концерт тамашачылар күңеленә хуш килде. Тирә-күрше мәдәният йорты җитәкчеләре һәм үзешчәннәре бергә берләшеп, өч сәгатькә якын барган чыгышлар белән көлдерделәр дә, елаттылар да. Чөнки концерт әниләр көне һәм инвалидлар декадасы уңаеннан оештырылган иде. Концертта Туймәт мәктәбе укучылары да катнашты. Гомумән, чыгышларны санап бетерерлек түгел. Шунысы куанычлы: һәрбер чыгыш тамашачы тарафыннан көчле алкышларга күмелде.

Районыбызның, авылыбызның мәдәният йорты җитәкчеләре халыкка мәдәният хезмәте күрсәтүнең төрле юлларын эзли. Әлеге ретро-концерт моңа ачык мисал булып тора. Рәхмәт оештыручыларга, рәхмәт катнашучыларга. Иҗади уңышлар теләп калабыз.

Декада кысаларында котлау һәм бүләкләү мөмкинлеге дә бар иде. Туймәт мәктәбе укытучылар коллективы форсаттан файдаланып игътибар күрсәттек һәм бүләк пакетлары тапшырдык.