Бөтендөнья  татар конгрессы  тарафыннан 2026 нчы ел татар дөньясы өчен  Габдулла Тукай елы дип иглъан ителде. Шул уңайдан, агымдагы елның 24-26 нчы апрель көннәрендә, унберенче тапкыр Дөньякүләм “Татарча диктант” белем  тикшерү акциясе уза. Чара бөек шагыйребез Габдулла Тукайның 140 еллыгына багышлана.Бүген,укучылар, укытучылар, мәктәп хезмәткәрләре, әти-әниләр, авыл китапханәсе, мәдәният  йорты, балалар бакчасы, авыл җирлеге хезмәткәрләре, авыл халкы авылыбыз китапханәсендә оештырылган мәйданчыкта “Татарча диктант” акциясендә катнаштык. Катнашучылар башта "Туган тел" шигырен, аннары шагыйрьнең "Бәхет" әсәрен яздылар. Акциядә барлыгы 43 кеше катнашты. Әлеге бик мөһим һәм күңелле вакыйга оешкан төстә узды.Шушындый матур традиция туган (татар) телебезне саклауга,яшь буынга тапшыруга ярдәм итә. Бу көнне оештыручыларга да, катнашучыларга да зур рәхмәт!