8 май көнне Туймәт авыл халкы, авыл җирлегендәге оешма вәкилләре, Туймәт төп белем мәктәбе  коллективы һәм укучылары,  кайткан кунаклар авыл уртасында урнашкан Билгесез солдат һәйкәле янына җыелдылар.  Анда Бөек Җиңүнең 74 еллыгы уңаеннан  митинг оештырылды. 

Митингта чыгыш ясаучылар да, шушы олы бәйрәм белән котларга, иң җылы, изге теләкләрен җиткерергә теләүчеләр дә бихисап булды. Кызганыч, Туймәт авылында бүгенгесе көндә бер генә Бөек Ватан сугышы ветераны да калмады. Алар барысы да мәрхүмнәр. Авыр, ач-ялангач  сугыш елларын кичергән тыл хезмәткәрләренең дә рәтләре көннән-көн сирәгәя бара. Тантаналы митинг барышында әйтелгән барлык изге теләкләр, җылы сүзләр мәрхүм ветераннарның рухына дога булып барсын, ә исәннәрнең киләчәк тормышына бәхет, тыныч күк йөзе, гомернең булган кадәренә ныклы исәнлек бирсен иде дигән теләктә калабыз.