Кышкы каникуллар вакытында балалар өчен авыл китапханәсендә "Китап сөючеләр атналыгы" исемендәге зур күләмле чара оештырылды. 2 нче гыйнвардан алып 8 нче гыйнварга кадәр китапханәче Галимова Наҗия ханым һәрбер сыйныф өчен тематик кичәләр үткәрә. Мәктәп укучыларында китапларга сакчыл караш, мәхәббәт тәрбияләү, саекмас белем чишмәсе булып торган басма чыганакларга карата кызыксыну уяту максатыннан әзерләнгән бу чараларда  балаларның яшь үзенчәлекләре дә, шәхси ихтыяҗлары да, төрле юнәлештә үстерелүче сәләтләре дә истә тотылган. Авыл китапханәсе белән мәктәп укучылары арасында элемтә бүген генә урнаштырылмады. Безнең балалар ел әйләнәсенә авыл китапханәсе хәзинәләреннән дәресләр, сыйныфтан тыш чаралар, үз мавыгуларына җавап табу өчен китаплар алалар, анда уздырылучы төрле конференцияләрдә актив катнашалар.