Бүгенгене белик, күрик дисәк,

Үткәннәргә борылып бер карыйк.

Безнең нәсел килә борынгыдан,

Шәҗәрәбез - затлы бер тарих.

Мәшһүр мәгърифәтче - галим, педагог, ахун Хөснулла Баһаветдин мирасын өйрәнү һәм тәрбия мәсьәләләрендә файдалану бүгенге көн яшьләре өчен бик урынлы һәм файдалы булыр иде. Хөснулла ахун Баһаветдин озын гомер, бай тормыш юлы үткән зыялыларыбызның берсе. Ул дин белән фәнне бергә уратып барган галим.Татар дөньясында чыгарыла торган барлык матбугат аның өстендә булган. Милләтенең алдынгылары аңа үрнәк . Халык аның янына күпләп йөргән, күпләп укыган, галим кешенең фикеренә колак салып яшәгән. Хөснулла бабай шулай итеп шушы төбәктә яшәүчеләрнең якын киңәшчесенә әверелгән.

Киләчәге бар милләт без,

Шәхесләргә бай милләт без.

Тарихларга бай милләт без,

Һәр нигезнең, һәр авылның,

Һәр каланың үткәне бар.

Гыйбрәт алырлык мирасның,

Калганы бар, киткәне бар....

Ата- бабалар узган юл - халкыбыз тарихы, ил тарихы ул. Ә бөек шәхесләребезнең үткәнен белмәсәк , безнең киләчәгебез озын гомерле булмас. Бөек мәгърифәтчебез Мәрҗәни : ”Үткәнен белмәгән халыкның киләчәге юк”,- дип язды. Мондый шәхесләре, тарихлары булган халыкның киләчәге өметле.