"Планетаны чүптән арындырыйк" акциясе кысаларында кичә мәктәптә чираттагы чара үтте. Дәресләрдән соң укучылар һәм укытучылар коллективы мәктәп янында өмә оештырдылар. Бакчадан яшелчәләрнең чүпләрен, беръеллык чәчәкләрнең сабакларын җыйдылар. Башлангычлар киләсе елга дип чәчәк орлыкларын алырга да онытмадылар. Җыелган чүпне дә өеп кенә куймадылар, техник хезмәткәр Наил абый Галимов ярдәме белән тракторга төяп, махсус урынга озаттылар. Мәктәп яны чип-чиста булып, эшләгән эшләрдән күңелгә рәхәт булып калды.