15 нче сентябрь көнне Чирмешән районының үзәк мәдәният йортында 14 яше тулган яшүсмерләргә тантаналы рәвештә паспорт тапшыру чарасы үткәрелде. Паспорт ул - кешенең шәхесен таныклаучы юридик документ, шуңа да беренче тапкыр әлеге документны кулда тоту дулкынландыргыч вакыйга. Бу - җәмгыятьтә синең хокукларыңның күбәюен һәм шул ук вакытта яңа бурычларыңның барлыкка килүен дә аңлата. Кичәнең төп өлешен район җитәкчесе Нурхәмәт Хәмидуллин алып барды, һәрбер балага үз кулы белән паспортларын тапшырды. Аларга киләчәк тормышларында бары тик яхшы билгеләренә генә укырга, үз юлларын табарга, исән булырга һәм җәмгыятькә файдалы кеше булып үсәргә теләк теләде. Безнең мәктәптән дә 5 укучы бу чарада катнаштылар. Без дә үз чиратыбызда балаларны тәүге җитди документ алулары белән чын күңелдән котлыйбыз.