Дөнья поэзиясе күгендә якты йолдызлардай балкыган шагыйрьләр аз түгел. Алар арасында азатлык көрәшенең ялкынлы җырчысы, шул көрәштә батырларча һәлак булган легендар герой - татар шагыйре Муса Җәлил исеме дә бар.  Аның исеме дөньяда үзенең Ватанына, үз халкына тугрылыклы булуның гүзәл символына әйләнде. Ул коточкыч авыр шартларда язган сәнгатьчә көчле әсәрләре белән татар шигъриятен бөтен дөньяга танытты.

Бүген Муса Җәлил исеме дөньяда яшәүче һәр халыкка билгеле. Аның исеме белән урам, бистә, шәһәрләр аталган. Галәмдәге бер кече планетага, Антарктидадагы иң биек кыяларның берсенә Муса Җәлил исеме бирелгән.

Февраль ае истәлекләргә бай булуына карамастан, М. Җәлил һәм аның көрәштәшләрен искә алу уңаеннан Туймәт төп белем мәктәбендә төрле чаралар уздырыла.  М. Җәлилнең тормыш юлы һәм иҗатына багышланган бай эчтәлекле күргәзмә оештырыла, "Әдәби-музыкаль кичә"дә, М. Җәлил шигырьләрен сәнгатьле сөйләм бәйгеләрендә укучылар бик теләп катнашалар.