Бүген Түбән Кәминкә авылы мәдәният йорты каршында зурлап "Карга боткасы" бәйрәме үткәрелде. Балаларны татар халкының милли бәйрәмнәре белән таныштыру,бердәмлек, дуслык хисләре, халкыбыз йолаларына хөрмәт тәрбияләү максатыннан без дә бу чарада бик теләп катнаштык. Балалар төрле уеннарда катнаштылар, биеделәр һәм җырладылар, алдан өйрәнелгән шигырьләрен сөйләделәр. Соңыннан барысы да төрле ярмалар салып пешерелгән ботка ашадылар, коймак белән сыйландылар.