Чирмешән лицее 2024 нче елның ноябрь аенда ТР Мәгариф һәм фән министрлыгы тарафыннан оештырылган “Татарстан Республикасы территориясендә яшәүче халыкларның телләрен, гореф-гадәтләрен, мәдәниятләрен саклауга һәм үстерүгә юнәлдерелгән проектларны тормышка ашыруда муниципаль мәктәпкәчә белем бирү оешмаларына һәм муниципаль гомуми белем бирү оешмаларына ярдәм күрсәтү” грантында “Туган телне уйный-уйный өйрәнәбез (Татар телендә курчак театры)” проекты белән катнашты һәм җиңү яулады.
Проектның максаты: «Чирмешән лицее»  укучыларына туган (татар) телне өйрәнү, шулай ук театр сәнгате чаралары ярдәмендә аларның иҗади, әхлакый-интеллектуаль үсеше өчен шартлар тудыру.
Проектның бурычлары: татар телендә сөйләшергә, аралашырга һәм фикер йөртергә өйрәтү; шәхеснең индивидуаль иҗади сәләтләрен ачу; үзеңне камилләштерүгә омтылуны хуплау; укучыларның әхлакый-интеллектуаль сыйфатларын формалаштыру.
Проект нигезендә эш ноябрь азагында ук башланды инде. 4 нче а сыйныфы укучылары (кл. җитәкчесе Мөхәммәтшина Гөлфирә Минәхсәновна) А.Алишның “Сертотмас үрдәк” әкиятен сәхнәләштерә башлады. Рольләрне башкаручыларны билгеләп, көн саен репетициягә калып, сүзләрне өйрәнделәр. Әкият геройлары - курчакларны кулларына киеп, хәрәкәт иттерү серләренә төшенделәр. Әкият өчен декорацияне технология укытучысы Новичкова Татьяна Григорьевна, татар теле укытучысы Котбиева Миләүшә Вагизовна һәм 9 нчы а сыйныфы кызлары әзерләде. Катыргыга өй, урман рәсемнәрен ясап, буяу һәм бизәү эшләрен башкардылар. Сәхнә өчен пәрдә-ширма тегеп, аны урман аланына охшатып бизәделәр. Ниһаять, кечкенә артистлар спектакль күрсәтергә әзер.