2017 нче елның 24 нче мартында Буа муниципаль районы мәгариф идарәсенең уку кабинетында 9 нчы сыйныфларда белем бирүче татар теле һәм әдәбияты укытучылары өчен өйрәтү семинары үткәрелде. Аның максаты – укучыларны татар теленнән имтиханнарга әзерләүдә укытучыларга методик ярдәм күрсәтү, югары нәтиҗәләргә ирешү юнәлешләрен билгеләү. Семинар барышында мәгариф идарәсе башлыгының укыту-методик эшләре буенча урынбасары Бикчәнтәева А.Р., өлкән методисты Хасанов И.М., милли мәгариф буенча җаваплы методист Хөснетдинова А.Ф. чыгышлары тыңланды. Укытучылар белән берлектә үткәрелгән БРТ буенча фикер алышынды, укучыларны имтиханнарга тиешле дәрәҗәдә әзерләү турында карар кабул ителде.