2017 нче елның  21 нче февралендә Күл-Черкен авылында РСФСР һәм ТАССР ның халык, Казахстанның атказанган рәссамы, Г. Тукай исемендәге дәүләт премиясе лауреаты, каллиграф, скульптор, шагыйрь, гарәп китаплары белгече, күренекле якташыбыз Бакый Урманченың тууына 120 ел тулуга багышланган республикакүләм чара узды. Бәйрәм тантанасында ТР Сынлы сәнгать музее директорының фәнни киңәшчесе, филология фәннәре докторы Сарчин Рамил Шәүкәт  улы; Буа муниципаль районы башлыгы урынбасары Сәйфетдинова Зөлфия Фатыйх кызы, “Туган як” музее директоры Әхмәтҗанова Люция Мәүлет кызы; якташ мөгаллим Рафикъ Ногманов; якташ рәссам Ярхунов Павел Валерьевич, мәгариф идарәсе методисты Хөснетдинова Алсу Фәрит кызы, Түбән Наратбаш һәм Черки-Кильдураз мәктәбе укытучылары, укучылары катнашты.

         Сәнгати чара барышында  Б.Урманченың музеенда аның тормыш юлы һәм иҗатына багышланган экскурсия оештырылды, бөек якташыбызның музее каршындагы бюстына чәчәкләр куелды. Алга таба бәйрәм мәдәният йортында дәвам итте. Анда Күл-Черкен мәктәбе укучылары һәм укытучылары коллективыннан торган “Өммегөлсем” ансамбле чыгыш ясады.      

         Якташыбызның истәлеген мәңгеләштерү тантанасы аның иҗатын киләчәк буыннарга җиткерүче милли чара буларак, күңелләрдә озак сакланыр.