Зиннатуллина Зинникамал әби 1919 елның (документ буенча 1920 ел) 19нчы маенда Буденый губернасы (хәзерге Буа районы) Ташкичү авылында Хәбибулла абый белән Минникамал апа гаиләсендә беренче бала булып дөньяга килә. 22 яшендә ул кияүгә чыга, ләкин озак бергә тору насыйп булмый. Сугыш башлану белән, ире сугышка китә һәм исән кайтмый. Сугыш еллары турында Зинникамал әби сөйләргә яратмый: “Күрдек инде күрмешне. Сезгә тыныч тормыш булсын”, -ди. Сугыш беткәч, сугыштан исән кайткан Мәүлет бабайга кияүгә чыга. Мәүлет бабай 3 ел Фин сугышында катнаша. Ватан сугышы башлангач, хәрби заводка эшкә керә. Сугыш беткәч тә 17 ел шунда эшли. Ә Зинникамал әби Суксу тимер юлы төзүдә эшли. Алар бергә 62 ел гомер иткәннәр. 4 ир бала, 1 кыз бала үстерәләр. 2008 елның апрелендә Мәүлет бабай гүр иясе була. Әбинең 10 оныгы, 6 оныкчыгы бар. Бүгенге көндә улы Җәүдәт, килене Резидә тәрбиясендә яши.