28 нче ноябрь көнне шәһәребезнең “Яшьләр сараенда”  күрше районнардан да килгән шигырь сөючеләр арасында Халыкара “Җәлил укулары” әдәби бәйгесенең зона этабы узды. Бу бәйге сөйләмне үстерү һәм нәфис сүз белән кызыксынуны формалаштыру, шигъри сүзнең матурлыгын һәм тәэсирлелеген  тоя белүне максат  итеп куя. Әлеге чарада лицей-интернатның 9 нчы сыйныф укучылары Сафин Илдар белән Газизуллин Булат та катнашты, чөнки алар муниципаль этапның җиңүчеләре сафында иде. Афәрин, егетләр!  “Җәлил татар телендә” номинациясендә катнашкан укучыларыбыз Резеда Сирин кызы җитәкчелегендә әзерләнделәр. Хәзер инде укучыларыбызны  һәм җитәкчеләрен тәүге җиңүләре белән котлап,  тагын да югарырак үрләр яулауларын теләп калабыз. 2 нче тур нәтиҗәләре дә куанычлы булыр дип  ышанабыз!