Әкияттә кунакта.

   Балачакның иң матур истәлекләре әти-әни, әби-бабай, туган тел белән бәйләнгән. Габдулла Тукайның “Туган теле” белән телебез ачылган булса, шагыйрь безнең сабый чакның аерылгысыз юлдашы. Тукайны укымаган-белмәгән татар кешесе юктыр. Әсәрләрен  ничә тапкыр ишетсәң дә, кабат-кабат андагы фикер тирәнлегенә таң каласың.

    Шагыйрьнең 125 еллык юбилей чаралары безнең мәктәптә “Су анасы, Шүрәлеләр – безнең дуслар барысы да” дигән кичә белән башланып китте. Күптәннән таныш Шүрәле, Су анасы  балалар янына кунакка килгәннәр иде. Шундый яхшылар, изге ниятлеләр, чөнки инде ничә еллар буе әкияттә яшәп, усаллыкның барыбер җиңелгәнен бик яхшы белә алар.

   Беренче сыйныфтан алып, алтынчы сыйныф укучылары катнашкан бу сәхнәләштерүдә һәркем үз ролен җиренә җиткереп башкарырга тырышты. Куркусыз Былтыр да, кесә телефонлы Шүрәле дә, елгада тәртип сагында торучы Су анасы да бик килештереп уйнады. Су анасының тарагын алып качкан малай, таракны югалып әрәм булмасын өчен алган икән. Беренче сыйныф укучысы нәни Аделина үзе дә чып-чын күбәләк кебек иде.

   Тамашачыларга, ә алар барлык башлангыч сыйныф укучылары, укытучылар, ата-аналар иде, бу әкиятләр бик ошады.

                                                                          Мәрдәншина Регина

                                                                       1нче урта мәктәпнең 6 сыйныф укучысы