Геройларны искә алып... Куныр һәм Шода авылларының Советлар Союзы Геройлары Х.Ибраһимов һәм Х.Сабировлар истәлегенә Шода мәктәп-бакча комплексында 1993-1995нче елгы егетләр арасында традиция буенча 2нче тапкыр ачык волейбол турниры үткәрелде. Ярышка Кукмара районының иң көчле 2 командасының катнашуы аерым бер төс бирде. Волейболчы егетләрнең матур уеннары Шода авылы спорт сөючеләре өчен аеруча куанычлы булды. Ярыш нәтиҗәләре буенча җиңүгә һәм кубокка Куныр урта мәктәбе, 2 урынга Янил урта мәктәбе, 3 урынга Янил аграр колледжы командалары лаек булдылар. Бу турнир Куныр мәктәбенең Сөләйманов Р.В. җитәкчелегендә волейбол командасының тагын бер кат осталыгын, җиңүгә омтылышы искиткеч көчле булуын күрсәтте. Һәр команданың уенчыларына, тренерларына жетоннар, грамоталар тапшырылды. Бу бүләкләрне махсус рәвештә Куныр урта мәктәбен тәмамлаган, хәзер ТР “Ак Барс” банкы идарәсендә эшләүче Габбасов Илшат алып бирде. Шулай ук һәр команда акчалата призлар белән дә бүләкләнде. Ярышны үткәрүгә “Якты юл” җәмгыяте, эшмәкәрләр Шакирҗанов Сәүбән, Сәләхетдинов Ирек һәм Норма автосервиз хуҗасы Әхмәдиев Фәнисләр бик зур ярдәм иттеләр. Спортчыларны тәмле ризыклар белән Фаилә Газизовна җитәкчелегендәге мәктәп-бакча комплексы хезмәткәрләре сыйлады. Аларның барысына да бик зур рәхмәт. Матди ярдәме өчен рәхмәтнең зурысын мәктәп директоры Галеев В.Г.ның сыйныфташы, дусты булган даими иганәчебез Фәнис Әхмәдиевкә җиткерәсебез килә. Ярыш тәмам. Киләсе елда Советлар Союзы Герое Х.Ибраһимовка, исән булса, 100 яшь булыр иде. Киләчәктә бу турнирны тагын да киңрәк масштабта үткәрергә җыенабыз. Куныр урта мәктәбенең тәрбия эшләре буенча директор урынбасары Т.Г.Газимҗанов