Мәктәпкәчә белем бирү учреждениесенең уртанчылар төркеме балалары Балтач үзәк китапханәсендә кунакта булдылар. Әлеге экскурсия оештыру тәртибе, максаты белән  алдагыларыннан бераз аерылып торды – балалар белән бергә әниләр дә чакырылды. Программада якты, бай  китапханә белән танышу, китапның тиңсез хәзинә, белем чыганагы булуы, аның белән ничек дуслашу турында китапханәче апалар оештырган тулы, бай эчтәлекле  аралашу-әңгәмә, әниләр һәм балалар катнашында “Әкиятләр илендә” темасына бирем-табышмаклар чишү, әкият геройлары белән очрашу, балалар башкаруында әниләр турында татар язучылары язган шигырьләр тыңлау узара үрелеп алып барылды. Шулай ук очрашуда катнашучылар китапханәдән китап алу тәртибе, аны саклап тоту кагыйдәләре, китапханәгә килеп танышырга мөмкин булган балалар өчен газета – журналлар турында мәгълүмат алдылар. Кыскасы, әлеге очрашу барыбыз өчен дә бик файдалы булды. Мөмкинлектән файдаланып, шундый бай эчтәлекле, мавыктыргыч очрашу уздырган  китапханәче апаларга балалар һәм әниләр исеменнән  зур рәхмәтебезне җиткерәбез.