Бөек шагыйребез Габдулла Тукайның иҗатын белмәгән, укымаган, яратмаган кеше юктыр мөгаен. Аның бишек җырларын тыңлап, әкиятләрен, шигырьләрен сөйләп үсмәгән, белмәгән кешене күз алдына китерү мөмкин түгел. Билгеле, болар барысы да кече яшьтән, гаиләдән, балалар бакчасыннан башлана.

Безнең "Сандугач" балалар бакчасында да милләтебезнең йөзек кашы булган Габдулла Тукай иҗатына багышланган атналык булып үтте. Зурлар төркеме"Алмалар" да балалар Тукайның әкиятләренә нигезләнгән мультфильмнар карадылар, үзләренең шигъри осталыкларын күрсәттеләр, әкиятләрдән өзекләр, шигырьләрне сәхнәләштерделәр, викторина сорауларына җавап бирделәр.Тукай турында белгәннәрен ныгыттылар.
Төркемдә балалар өчен рәсем конкурсы һәм төрле дидактик уеннар да оештырылды: “Габдулла Тукайның китапларын тап”, “Кайсы әсәрдән”, “Рәсемгә карап хикәя төзибез”, “Серле капчык”. Габдулла Тукайның бүген дә актуальлеген югалтмаган әсәрләре буенча үткәрелгән уеннар балаларны тәрбияләүдә үрнәк, өлге булып тора.