Зәңгәр күк йөзендә кояш балкыган чакта, шаулап-гөрләп килгән яз ае – апрельдә безнең яраткан шагыйребез Габдулла Тукай туган.

Бөек татар шагыйренең туган көнен ел саен билгеләп үтү безнең мәктәптә матур традициягә әйләнде. Быел да Г. Тукайның иҗатын өйрәнүгә багышладык. Аның шигырьләрен укыдык, әкиятләрен тыңладык, шигырьләре буенча эшләнгән мультфильмнар карадык.

Концертта гимназия укучылары «Шурәле», «Су анасы», «Кызыклы шәкерт», «Бала белән күбәләк», «Таз» шигырьләрен сәхнәләштерде. Г. Тукай иҗаты аша балаларыбызда туган телебез – татар теленә мәхәббәт хисе тәрбияләнә. Туган тел ул әти-әни кебек үк газиз нәрсә.