21 март Бөтендөнья шигърият көне-шагыйрьләрне хөрмәтләү, шигырь уку традицияләрен торгызу,  шигырь укуга кызыксынуны арттыру, шигърият белән театр, бию, музыка һәм рәсем сәнгате кебек башка сәнгать төрләре арасында якынаюга ярдәм итү, шулай ук массакүләм мәгълүмат чараларында шигъриятне киңрәк яктыртуны тәэмин итү өчен сәбәп. Бу көнне төрле тематик чаралар: шигъри укулар, әдәби семинарлар һәм конкурслар уздыру кабул ителгән. Иске Өҗем төп гомуми белем бирү мәктәбендә китапханәче Габдрахманова Нәзирә Шамил кызы 5-6 класс укучылары өчен" Шигърият "дигән чара үткәрде. Нәзирә апалары укучыларга районыбызда эшләп килгән "Күңел чыңы" иҗат берләшмәсе шагыйрьләре һәм авылыбызда яшәп иҗат итүчеләр  турында сөйләде. Аларның шигырьләре белән таныштырды һәм шигырь укуны оештырды. Татар теле һәм әдәбияты укытучысы Каюмова Гөлфия Вәдүт кызы да шигырьләр укыды.